саманедастатковасьць

эндапартрэт. эскіз

Fri, 16 May 2008 19:56:27 GMT

сёньня
на апошнім годзе жыцьця
памерла
надзея
што
першае будзе першым
апошняе апошнім

аўтапартрэт. інтэрпрэтацыя

Fri, 16 May 2008 18:23:23 GMT

калекцыянэр
нарцысічнай
інтэрпрэтацыі знакаў
ўвагі
аднае асобы
вымушаны
праз голад
празь беднасьць
папаўняць калекцыю
за кошт
іншых асобаў
і іхных знакаў

***

Sat, 10 May 2008 10:18:25 GMT

тут няўтульна
голая сьцяна
прыкрывае сорам гадзіньнікам
як і я
паказваючы што час
ісьці
ты можаш маўчаць і далей
але пакінь за сабой
хоць апошняе слова
пакуль я не пераступіў
болевы парог

***

Sun, 04 May 2008 23:06:06 GMT

акіянічны суп
марская каша
жалезныя перакананьні
незямнымі кулямі
ссыпаліся
ў скроні
дна майго
якому
іржавець

***

Thu, 01 May 2008 13:44:52 GMT

мой ход канём:
зь я1
зьнікае твая фігура

***

Tue, 29 Apr 2008 18:41:41 GMT

твой узрост
вагаецца
на грані голасу
краі броваў
у якім няма выхаду
да мора
дык колькі табе?
усе даюць столькі
колькі ты й маеш
я б аддаў усё

***

Thu, 24 Apr 2008 08:34:03 GMT

усе белыя лані
плывуць у вырай
ня зь імі - ты
заўсёдна загарэлая
ідэяй
быць не з усімі
назусім
зусім белая
зусім лань

***

Sun, 20 Apr 2008 23:15:14 GMT

простыя роўназалежныя лініі
ніколі перасякаюцца
а пры скажэнні прасторы
скажы проста
не

***

Mon, 07 Apr 2008 17:59:33 GMT

фіранка ня стрымлівала вецер

станавілася халодна

у незачыненым вакне ты бачыла прычыну

яна йшла голая і

думала

пра мяне

каб ня зводзіць цябе ў зман

я выйшаў

і стаў пад вакном

***

Sat, 05 Apr 2008 08:41:51 GMT

кола тваіх сяброў

сьмяротна пераехала

тваю мінуласьць

узамен

ты думаеш па-новаму

ўжываеш новыя словы

па-новаму глядзіш

на новага сябе

я зраблю новую музыку

каб хоць нешта

пачулі

твае новыя вушы

а нур хісткі

Wed, 02 Apr 2008 23:56:48 GMT

прашу цябе

неадкладна вызваліць

месца пад сонца:

мяне мала –

я не адпавядаю неабходным

памерам

таму адзін я ня вызвалю

мы ж адсюль

і мы ведаем што

плошча Незалежнасьці

роўная

плошчы Свабоды

а разам яны адпавядаюць

усёй плошчы

нас з табой

***

Thu, 27 Mar 2008 21:51:13 GMT

зубы
скалы
самае сапраўднае сьвята
на іхнай вышыні вастрыні
мэта
наколваць падэшвы на крок наперад

***

Wed, 26 Mar 2008 15:21:20 GMT

магніт
гарбатай аркі
прыцягвае за вопратку
да адказнасьці
і потым
аблеплены
цьвікамі і гвазьдзікамі
ўскладаецца на галаву
дзеля ўсяго дзеля

***

Tue, 25 Mar 2008 09:41:58 GMT

узьніклыя на мне
шчыліны ад замкоў
вядуць да самарасколу
на назіральніка
назіранага і
на замок

***

Fri, 21 Mar 2008 23:15:20 GMT

колькі паўтараць:
перад уваходам
у транспартнае грамадзтва
не кладзі ў кішэні жыцьцё
калі ніхто ня выцягне
яно ж застанецца

Пажлік (аповяд не пра ўсіх)

Mon, 17 Mar 2008 21:19:26 GMT

Пажарны апавяшчальнік тактоўна кранаў манатоннымі кроплямі вушы. Я налічыў ужо многа разоў, але гэта не дало мне нічога каштоўнага. Нарэсьце, яна вярнулася, выцерла пыл зь ілба і стала думаць, што трэба зрабіць са мной. Есьці не хацелася, таму яна прынесла мне клязэт, і я ў яго схадзіў. Ад сораму мне прыйшлося доўга прывыкаць да гэтае працэдуры і я прывык да сораму, неадрыўна гледзячы ў столь. Потым яна абцёрла мяне. Есьці не хацелася, таму я зноў стаў лічыць кароткія сыгналы Пажліка (трэба сказаць, што я здорава пасябраваў з апавяшчальнікам і нават даў яму імя). Яна даўно са мной не размаўляла, зрэшты, я сам ня мог сказаць ні слова, таму я ў асноўным думаў і лічыў. А думаў я пра многае. Ці думаў, што думаю пра многае… Хаця, мажліва, я думаў нікчэмна мала, калі параўноўваць з тым, што я лічыў. А лічыў я многа. Ці лічыў, што лічыў многа. Гэта разумее толькі паралізаваны, прывязаны да столі Пажлік: ён такі ж, як і я.

***

Sat, 15 Mar 2008 22:28:59 GMT

мяняю на першы погляд
сябе
каб пакрыць нястачы
пры дэтальным разглядзе

***

Sat, 15 Mar 2008 19:29:42 GMT

калі ўсе спалі
прыляцелы з вуліцы крык
страціў тут моц
аддаўшы яе мне
гэтага хапіла на тое
каб я крыкнуў
у адказ
ты прачнулася –
цяпер твая чарга
паказаць сваю моц

***

Wed, 05 Mar 2008 02:39:30 GMT

заўтра
каб пасьпець сустрэцца
з табой
трэба прачнуцца
а лепшай гадзіне
хаця
і гэта запозна

***

Tue, 04 Mar 2008 17:54:10 GMT

уночы
ўсе шэрыя каты
выскрэбваюць
мне на сэрцы
вадзяныя знакі адрозьненьня
ад фальшывасьці
якія правяраюцца
дзённым сьвятлом
і толькі
ў тваёй прысутнасьці

***

Fri, 29 Feb 2008 21:17:05 GMT

гэта мая віна

што ў цябе

на самым версе

прарвала трубу

з гарачай

бядой

зь якой не спраўляюцца

ні сурвэткі

ні насоўкі

***

Wed, 27 Feb 2008 10:26:12 GMT

з абяцаньнем
другога прышэсьця
ты пакінула
ўвесь мой сьвет
чакаць
цудоўна ведаючы
аб маёй перакананасьці
ў тваёй
непаўторнасьці

***

Tue, 26 Feb 2008 18:46:34 GMT

І.К.
на наступны дзень
мы адчынімся
ў складзе ўстановы заўтра
пры сёньня
але ты тут
ні пры чым

***

Sun, 24 Feb 2008 15:21:26 GMT

перадапошнім часам
мне сорамна прасіць у цябе
кроплю ўвагі
таму што яе нашмат больш
чым кропля
і яна нашмат больш
чым увага

***

Wed, 20 Feb 2008 21:44:05 GMT

на выпадак нашай сьмерці
на мне
зарэзэрваваныя
два
шэра-зялёныя месцы
якія заўжды
належным чынам
будуць дагледжаныя
і аплаканыя