саманедастатковасьць

***

2008-05-10T10:18:25Z

тут няўтульна
голая сьцяна
прыкрывае сорам гадзіньнікам
як і я
паказваючы што час
ісьці
ты можаш маўчаць і далей
але пакінь за сабой
хоць апошняе слова
пакуль я не пераступіў
болевы парог

***

2008-05-04T23:06:06Z

акіянічны суп
марская каша
жалезныя перакананьні
незямнымі кулямі
ссыпаліся
ў скроні
дна майго
якому
іржавець

***

2008-05-01T13:44:52Z

мой ход канём:
зь я1
зьнікае твая фігура

***

2008-04-29T18:41:41Z

твой узрост
вагаецца
на грані голасу
краі броваў
у якім няма выхаду
да мора
дык колькі табе?
усе даюць столькі
колькі ты й маеш
я б аддаў усё

***

2008-04-24T08:34:03Z

усе белыя лані
плывуць у вырай
ня зь імі - ты
заўсёдна загарэлая
ідэяй
быць не з усімі
назусім
зусім белая
зусім лань

***

2008-04-20T23:15:14Z

простыя роўназалежныя лініі
ніколі перасякаюцца
а пры скажэнні прасторы
скажы проста
не

***

2008-04-07T17:59:33Z

фіранка ня стрымлівала вецер

станавілася халодна

у незачыненым вакне ты бачыла прычыну

яна йшла голая і

думала

пра мяне

каб ня зводзіць цябе ў зман

я выйшаў

і стаў пад вакном

***

2008-04-05T08:41:51Z

кола тваіх сяброў

сьмяротна пераехала

тваю мінуласьць

узамен

ты думаеш па-новаму

ўжываеш новыя словы

па-новаму глядзіш

на новага сябе

я зраблю новую музыку

каб хоць нешта

пачулі

твае новыя вушы

а нур хісткі

2008-04-02T23:56:48Z

прашу цябе

неадкладна вызваліць

месца пад сонца:

мяне мала –

я не адпавядаю неабходным

памерам

таму адзін я ня вызвалю

мы ж адсюль

і мы ведаем што

плошча Незалежнасьці

роўная

плошчы Свабоды

а разам яны адпавядаюць

усёй плошчы

нас з табой

***

2008-03-27T21:51:13Z

зубы
скалы
самае сапраўднае сьвята
на іхнай вышыні вастрыні
мэта
наколваць падэшвы на крок наперад

***

2008-03-26T15:21:20Z

магніт
гарбатай аркі
прыцягвае за вопратку
да адказнасьці
і потым
аблеплены
цьвікамі і гвазьдзікамі
ўскладаецца на галаву
дзеля ўсяго дзеля

***

2008-03-25T09:41:58Z

узьніклыя на мне
шчыліны ад замкоў
вядуць да самарасколу
на назіральніка
назіранага і
на замок

***

2008-03-21T23:15:20Z

колькі паўтараць:
перад уваходам
у транспартнае грамадзтва
не кладзі ў кішэні жыцьцё
калі ніхто ня выцягне
яно ж застанецца

Пажлік (аповяд не пра ўсіх)

2008-03-17T21:19:26Z

Пажарны апавяшчальнік тактоўна кранаў манатоннымі кроплямі вушы. Я налічыў ужо многа разоў, але гэта не дало мне нічога каштоўнага. Нарэсьце, яна вярнулася, выцерла пыл зь ілба і стала думаць, што трэба зрабіць са мной. Есьці не хацелася, таму яна прынесла мне клязэт, і я ў яго схадзіў. Ад сораму мне прыйшлося доўга прывыкаць да гэтае працэдуры і я прывык да сораму, неадрыўна гледзячы ў столь. Потым яна абцёрла мяне. Есьці не хацелася, таму я зноў стаў лічыць кароткія сыгналы Пажліка (трэба сказаць, што я здорава пасябраваў з апавяшчальнікам і нават даў яму імя). Яна даўно са мной не размаўляла, зрэшты, я сам ня мог сказаць ні слова, таму я ў асноўным думаў і лічыў. А думаў я пра многае. Ці думаў, што думаю пра многае… Хаця, мажліва, я думаў нікчэмна мала, калі параўноўваць з тым, што я лічыў. А лічыў я многа. Ці лічыў, што лічыў многа. Гэта разумее толькі паралізаваны, прывязаны да столі Пажлік: ён такі ж, як і я.

***

2008-03-15T22:28:59Z

мяняю на першы погляд
сябе
каб пакрыць нястачы
пры дэтальным разглядзе

***

2008-03-15T19:29:42Z

калі ўсе спалі
прыляцелы з вуліцы крык
страціў тут моц
аддаўшы яе мне
гэтага хапіла на тое
каб я крыкнуў
у адказ
ты прачнулася –
цяпер твая чарга
паказаць сваю моц

***

2008-03-05T02:39:30Z

заўтра
каб пасьпець сустрэцца
з табой
трэба прачнуцца
а лепшай гадзіне
хаця
і гэта запозна

***

2008-03-04T17:54:10Z

уночы
ўсе шэрыя каты
выскрэбваюць
мне на сэрцы
вадзяныя знакі адрозьненьня
ад фальшывасьці
якія правяраюцца
дзённым сьвятлом
і толькі
ў тваёй прысутнасьці

***

2008-02-29T21:17:05Z

гэта мая віна

што ў цябе

на самым версе

прарвала трубу

з гарачай

бядой

зь якой не спраўляюцца

ні сурвэткі

ні насоўкі

***

2008-02-27T10:26:12Z

з абяцаньнем
другога прышэсьця
ты пакінула
ўвесь мой сьвет
чакаць
цудоўна ведаючы
аб маёй перакананасьці
ў тваёй
непаўторнасьці

***

2008-02-26T18:46:34Z

І.К.
на наступны дзень
мы адчынімся
ў складзе ўстановы заўтра
пры сёньня
але ты тут
ні пры чым

***

2008-02-24T15:21:26Z

перадапошнім часам
мне сорамна прасіць у цябе
кроплю ўвагі
таму што яе нашмат больш
чым кропля
і яна нашмат больш
чым увага

***

2008-02-20T21:44:05Z

на выпадак нашай сьмерці
на мне
зарэзэрваваныя
два
шэра-зялёныя месцы
якія заўжды
належным чынам
будуць дагледжаныя
і аплаканыя

Майкл Палмер

2008-02-20T00:47:59Z

Начное неба

Стул рос з падлогі

Цяпер калі час

Класічных формаў скончыўся

Цягнік крануўся але пакуль мы

тут падзяляючы

тыя апошнія імгненні сну

да таго як сон адновіцца.

Гэта заўважна на фота

абгароджанага сценамі гораду

або драўлянага карабля

павекі склейваюцца разам

з шэрагамі пасажыраў

і адсутнасцю рухаў.

Эзра Паўнд

2008-02-20T00:05:55Z

БЕЛАСЬЦЬ

Гэтая лэдзі ў белай адзежы, якую яна заве пэньюар,

Ёсьць пакуль каханкай майго сябра.

І пяшчотныя лапкі ейнага белага сабачка

Наўрад пяшчотнейшыя ад ейных ног.

Гацье, мусіць, зьненавідзеў бы гэтыя кантрасты белага,

Калі яна сядзіць у велічэзным фатэлі

Паміж дзьвюх мігатлівых сьвечак.